January 23, 2022 5:34 am

HTML img Tag Planetsoda
Breaking News

കുവൈറ്റില്‍ 60 കഴിഞ്ഞവരുടെ വിസ പുതുക്കല്‍: നിര്‍ത്തിയിട്ട് ഒരു വര്‍ഷം, ഇനിയും തീരുമാനമായില്ല – Samayam Malayalam

ഇവരുടെ വിസ പുതുക്കി നല്‍കാന്‍ തത്വത്തില്‍ തീരുമാനമായെങ്കിലും ഇതുമായി ബന്ധപ്പെട്ട നടപടിക്രമങ്ങള്‍ ഇതുവരെ ആരംഭിച്ചിട്ടില്ല. ഇക്കാര്യത്തില്‍ യുക്തമായ തീരുമാനം എടുക്കാന്‍ അധികൃതര്‍ക്ക് സാധിക്കാത്തതാണ് പ്രശ്നങ്ങള്‍ക്ക് കാരണമെന്ന് പ്രാദേശിക മാധ്യമങ്ങള്‍ ചൂണ്ടിക്കാട്ടി. വിസ പുതുക്കന്നതിനുള്ള 500 ദിനാര്‍ ഫീസും ആരോഗ്യ ഇന്‍ഷൂറന്‍സിനുള്ള 500 ദിനാറും ഉള്‍പ്പെടെ 1000 ദിനാര്‍ ഈടാക്കി വിസ പുതുക്കി നല്‍കാമെന്ന് മാന്‍പവര്‍ അതോറിറ്റി പിന്നീട് തീരുമാനിച്ചിരുന്നുവെങ്കിലും ഇക്കാര്യത്തില്‍ തുടര്‍ നടപടികള്‍ ഉണ്ടായില്ല.

1000 ദിനാര്‍ ഫീസ് ഈടാക്കി വിസ പുതുക്കി നല്‍കാനുള്ള തീരുമാനത്തിന് ഫത്വ, നിയമനിര്‍മാണ വകുപ്പിന്റെ അംഗീകാരം കാത്ത് കഴിയുകയാണ് മാന്‍പവര്‍ അതോറിറ്റിയെന്നാണ് റിപ്പോര്‍ട്ട്. ഇക്കാര്യത്തില്‍ വ്യവസായ, വാണിജ്യ മന്ത്രിയും പബ്ലിക് മാന്‍പവര്‍ അതോറിറ്റി ചെയര്‍മാനുമായ അബ്ദുല്ല അല്‍ സല്‍മാന്‍ ഫത്വ കമ്മിറ്റിക്ക് കത്തുനല്‍കിയിരുന്നു. എന്നാല്‍, ഈ കത്തിന് ഇതുവരെ ഔദ്യോഗികമായി മറുപടി നല്‍കിയിട്ടില്ലെന്നാണ് റിപ്പോര്‍ട്ട്.

നിലവിലെ നിയമ പ്രകാരം, വിസ പുതുക്കുന്നതിന് പുതുതായി നിയന്ത്രണങ്ങള്‍ കൊണ്ടുവരുന്നതിന് വിലക്കുണ്ട് എന്നതിന്റെ അടിസ്ഥാനത്തിലാണ് നേരത്തേ 60 കഴിഞ്ഞവരുടെ വിസ പുതുക്കി നല്‍കില്ലെന്ന മാന്‍പവര്‍ അതോറിറ്റിയുടെ തീരുമാനത്തെ ഫത്‌വ വകുപ്പ് തള്ളിയത്. എന്നാല്‍, 500 ദിനാര്‍ ഫീസ് ഈടാക്കി വിസ പുതുക്കുന്നതിനുള്ള തീരുമാനത്തില്‍ നിയമപരമായ തെറ്റില്ലെന്നാണ് വകുപ്പിന്റെ പക്ഷം. എന്നാല്‍, ഇക്കാര്യം അതോറിറ്റിയെ വാക്കാല്‍ അറിയിച്ചുട്ടുണ്ടെങ്കിലും രേഖാ മൂലം കത്തിന് മറുപടി നല്‍കിയിട്ടില്ലെന്ന് മാധ്യമങ്ങള്‍ റിപ്പോര്‍ട്ട് ചെയ്തു.

പുതിയ സാഹചര്യത്തില്‍ 60 കഴിഞ്ഞവരും ബിരുദ യോഗ്യത ഇല്ലാത്തവരുമായ പ്രവാസികളുടെ വിസ പുതുക്കി നല്‍കുന്ന കാര്യത്തില്‍ ഈ വര്‍ഷം തീരുമാനം ഉണ്ടാവില്ലെന്നാണ് വിലയിരുത്തപ്പെടുന്നത്. പുതിയ സര്‍ക്കാര്‍ അധികാരത്തില്‍ വന്നതിനു ശേഷം ജനുവരിയില്‍ മാത്രമേ ഇതുമായി ബന്ധപ്പെട്ട് അന്തിമ തീരുമാനം കൈക്കൊള്ളുകയുള്ളൂ. നിലവില്‍ 1000 ദിനാര്‍ നല്‍കി വിസ പുതുക്കാന്‍ സന്നദ്ധരായി പ്രവാസികള്‍ മുന്നോട്ടുവന്നിട്ടുണ്ടെങ്കിലും വിസ പുതുക്കി നല്‍കാന്‍ അധികൃതര്‍ തയ്യാറായിട്ടില്ല. ഇതുമായി ബന്ധപ്പെട്ട് അന്തിമ തീരുമാനം വന്ന ശേഷമേ ഫീസ് സ്വീകരിക്കാനാവൂ എന്നതാണ് മാന്‍പവര്‍ അതോറിറ്റിയുടെ നിലപാട്.

വിസ പുതുക്കുന്നതിന് വ്യവസ്ഥ ചെയ്തിരിക്കുന്ന ആരോഗ്യ ഇന്‍ഷുറന്‍സുമായി ബന്ധപ്പെട്ട് രാജ്യത്തെ ഏതാനും സ്വകാര്യ കമ്പനികളുമായി ധാരണയിലെത്തിയതായും അല്‍ റായ് പത്രം റിപ്പോര്‍ട്ട് ചെയ്തു. 500 മുതല്‍ 550 വരെ ദിനാര്‍ ഇന്‍ഷൂറന്‍സിന് ചെലവ് വരുമെന്നാണ് കണക്കാക്കപ്പെടുന്നത്. ഇന്‍ഷുറന്‍സ് പോളിസിയുമായി ബന്ധപ്പെട്ട വിശദാംശങ്ങളിലും അന്തിമ തീരുമാനമായിട്ടുണ്ട്. ഇതുമായി ബന്ധപ്പെട്ട നിയമങ്ങളും ചട്ടങ്ങളും തയ്യാറാക്കി കമ്പനികള്‍ തൊഴില്‍ മന്ത്രാലയത്തിന് ഉടന്‍ സമര്‍പ്പിക്കും. ഇന്‍ഷുറന്‍സിനുള്ള തുകയും ഉള്‍പ്പെടെ വിസ പുതുക്കുന്നതിന് 1000 മുതല്‍ 1050 ദിനാര്‍ വരെ ചെലവ് വരുമെന്നാണ് നിലവില്‍ വിലയിരുത്തപ്പെടുന്നത്.

60 കഴിഞ്ഞവരും ബിരുദ യോഗ്യത ഇല്ലാത്തവരുമായ 53,000ത്തിലേറെ പ്രവാസികളാണ് രാജ്യത്ത് നിലവില്‍ താമസിക്കുന്നതെന്നാണ് കണക്ക്. ഇവരില്‍ ആയിരക്കണക്കിന് പേരുടെ വിസ കാലാവധി നേരത്തേ അവസാനിച്ചിരുന്നു. ഈ വര്‍ഷം ജനുവരി മുതല്‍ നിലവില്‍ വന്ന വിസ പുതുക്കല്‍ വിലക്കിനെ തുടര്‍ന്ന് വിസ പുതുക്കല്‍ നടപടികള്‍ അനിശ്ചിതത്വത്തിലാവുകയായിരുന്നു. അതിനിടെ, വിസ പുതുക്കാനാവാതെ ആയിരക്കണക്കിന് പ്രവാസികള്‍ സ്വന്തം നാടുകളിലേക്ക് മടങ്ങുകയും ചെയ്തു. അതേസമയം, വിദ്യാഭ്യാസ യോഗ്യത പരിഗണിക്കാതെ 60 വയസ്സ് കഴിഞ്ഞ മുഴുവന്‍ പ്രവാസികള്‍ക്കും വിസ പുതുക്കാന്‍ ആരോഗ്യ ഇന്‍ഷുറന്‍സ് എടുക്കണമെന്ന നിബന്ധന നടപ്പിലാക്കിയേക്കുമെന്നും റിപ്പോര്‍ട്ടുകളുണ്ട്. വിസ പുതുക്കാന്‍ ആരോഗ്യ ഇന്‍ഷുറന്‍സ് വേണമെന്ന നിബന്ധന ബിരുദമുള്ളവര്‍ക്കും ഇല്ലാത്തവര്‍ക്കും ബാധകമാക്കാനാണ് മാന്‍പവര്‍ അതോറിറ്റി ആലോചിക്കുന്നത്.

source

About The Author

Related posts